Ríkisstjórn fyrirheita og brostinna vona

Loforð og fyrirheit voru ekki aðeins gefin fyrir alþingiskosningarnar 2024 heldur ekki síður af ráðherrum samsteypustjórnar Samfylkingar, Viðreisnar og Flokks fólksins þegar hún tók við völdum í desember 2024. Kristrún Frostadóttir forsætisráðherra dró ekki úr væntingum landsmanna um betri tíma í fyrstu stefnuræðu sinni 10. febrúar 2025.

Í nýjasta þætti Alltaf til hægri er fjallað um fögur fyrirheit sem hafa að mestu reynst innantóm loforð hefðbundinnar vinstri stjórnar. Þegar ríkisstjórnin tók við var verðbólga 4,8% og hafði farið lækkandi allt frá ársbyrjun 2023 þegar hún fór yfir 10% í kjölfar Covid, Reykjaneselda og hækkandi heimsmarkaðsverðs á orku vegna innrásar Rússa í Úkraínu. Verðbólgan er nú 5,2%. Sama á við um lækkun vaxta. Vaxtalækkunarferlið var hafið í tíð fyrri ríkisstjórnar. Svokölluð kyrrstaða hefur ekki verið rofin, þvert á móti hefur hægst á hjólum efnahagslífsins og atvinnuleysi aukist og hefur ekki verið meira frá covid-tímanum.

Það er ekki sérlega óvæginn dómur yfir ríkisstjórn Kristrúnar Frostadóttur, eftir 14 mánuði í stjórnarráðinu, að segja að stjórnin hafi komið litlu í verk og að staða flestra heimila og fyrirtækja sé verri nú en þegar ríkisstjórnin tók við völdum í desember 2024. Hástemmdar yfirlýsingar í upphafi eru annað hvort gleymdar eða hljóma líkt og háðung fyrir ríkisstjórnina.

Vinstri ríkisstjórn Samfylkingar, Viðreisnar og Flokks fólksins minnir æ meira á síðustu hreinu vinstri stjórnina undir forsæti Samfylkingar á árunum 2009 til 2013. Engu er líkara en Kristrún Frostadóttir hafi grafið upp gamlan leiðarvísi frá Jóhönnu Sigurðardóttur.

Hægt er að hlusta á Alltaf til hægri á öllum helstu hlaðvarpsveitum meðal annars hér.