Ráðherra veit best?
Hanna Katrín Friðriksson atvinnuvegaráðherra hafnar því með öllu að frumvarp hennar um breytingar á búvörulögum leiði til afturvirkni líkt og tveir fyrrverandi forsetar Hæstaréttar halda fram. Hagsmunaaðilar hafa sett fram svipaða gagnrýni í umsögnum um frumvarpið og bent á að með samþykki þess skapist lagaleg óvissa og möguleg bótaskylda ríkisins. Frumvarpið er til efnislegrar meðferðar hjá atvinnuveganefnd þingsins.
„Það er algjörlega af og frá að það sé hugmyndin, eða það megi skilja frumvarpið þannig að það valdi afturvirkni,“ segir ráðherrann í samtali við Morgunblaðið (11. febrúar).
Sigurður Kári Kristjánsson hæstaréttarlögmaður velti því fyrir sér hvort þessi viðbrögð ráðherrans séu ekki „full stórkarlaleg þegar ekki bara einn heldur tveir fyrrverandi forsetar Hæstaréttar Íslands og lagaprófessorar hafa bent á með rökstuddum hætti að lagafrumvarp ráðherrans sé meingallað“. Sigurður Kári dregur saman helstu aðfinnslur Markúsar Sigurbjörnssonar og Þorgeirs Örlygssonar, sem báðir hafa verið forsetar Hæstaréttar:
- Veruleg óvissa og þversagnir.
- Heimildir Samkeppniseftirlitsins skortir skýrleika og fyrirsjáanleika.
- „Fullkomin óvissa“ um áhrif á þegar gerða samninga.
- Efast um að frumvarpið standist stjórnskipan.
- Hætta á tjóni og bótaábyrgð.
Atvinnuvegaráðherra telur sig hafa betri skilning á áhrifum lagasetningar en þeir menn sem byggja á áratuga reynslu og þekkingu við að leysa úr flóknum lagalegum álitaefnum. Sjálfsöryggi Hönnu Katrínar er hins vegar ekki meira en svo að ekki meira en svo að hún vísar til lögfræðinga ráðuneytisins þegar kemur að því að svara gagnrýni um að frumvarpið sé hrákasmíð.
